MIZORAM LARSAP IN SAIHA A LO THLENG

Mizoram Larsap Lt. General (Rtd) Pu M.M.Lakhera PVSM,AVSM,VSM chuan nimin chawhnu dar 12 : 55 khan Parva atangin Helicopter in Saiha alo thleng. Saiha Helipad-ah hian District Bawrhsap Pu Kunal IAS, Pu S.Khipo, C.E.M., M.A.D.C., leh Pi Suman Goyal I.P.S., S.P. Saiha te chuan anlo dawngsawnga, Saiha khawchhunga zirlai naupang pawl 5 – 12 ten Helipad atanga DCs Office Complex inkar kawng tluanin,kawng sirah intlarin Larsap hi an lo hmuak bawk ani.

Amah lo hmuahna inkhawm tawi D.Cs Conference Hall Saiha-a buatsaih ah Guard of Honour Mizoram Police, Saiha ten an pek zawh in Hnamhla G.H.S.S. Saiha School naupang ten sa in Larsap hi an lo lawm ani. Saiha District chhunga Department hrang hrang hotute, Mara Autonomous District Council hruaitute, Tlawmngai pawl hrang hrang hruaitute leh Chanchinthar thehdarhtu ten amah hi lo hmuakin parthi awrhtir ani a. District chhunga department hrang hrang hotute nen DC’s Conference Hall, Saiha-ah meeting pawimawh tak an nei zui nghal ani.

He meeting Pu Kunal District Bawrhsap kaihhruai ah hian thu sawiin Larsap chuan Mizoram hmasawn theih lohna pakhat chu a hun taka project thehluh loh leh Utilisation Certificate thehluh kan ngaihsak thin lo hi ani a ti a, tunhnai ruahsur nasat avanga Saiha District in harsatna hrang hrang kan tawh chungchangah min tuarpui takzet thu sawiin tun atang chuan In leh Lo, Khua leh Kalkawng te kan din dawnah ruahmanna felfai tak kan neih hmasak phawt a pawimawh ani, tiin hei hian chhiatna nasa tak chu min pumpelh tir thei dawn ani, ati bawk. Larsap chuan Mara Autonomous District Council Office a tlawh leh nghal a, M.A.D.C. Office Complex-a amah lo hmuahna inkhawm tawi buatsaihah Pu F.C. Zase Chairman, M.A.D.C. chuan amah lo chawnglawm-na thu a sawia, hemi hnu hian M.A.D.C.a hruaitute nen inkawm hona hun tha tak an nei zui nghala, M.A.D.C.hotuten an harsatna hrang hrang an thlen te chu Larsap chuan a theih ang anga lo bawhzui a tum thu a sawi ani. M.A.D.C. hotute hian Larsap hi Darkhuang an lo pe a, Larsap hian infiamna bungrua engemawzat District Council hnuaia Sports Department te hnenah a hlan ve nghal bawk ani. Nimin vek tlai dar 3 : 00 khan Larsap hian Saiha a chhuahsan leh nghal ani.

Larsap hi Aizawl atangin P.Chakraborty MJS, Commissioner & Secretary, District Council Affairs leh Pu Lalrikhuma Sailo Deputy Adviser, Mizoram State Planning Board ten an rawn tawiawm ani.


Source: saihaherald.wordpress.com